Астана қаласы әкімдігінің Сервис және туризм колледжі Ілияс Жансүгіров атындағы №58 мектеп-гимназиясымен бірлесіп, Қазақстан Республикасы Үкіметінің 2024 жылғы 30 желтоқсандағы №1134 қаулысына сәйкес «Бір мектеп – бір дағды» жобасын іске асыру жөніндегі жоспарға қол қойды.
Аталған жоба жұмысшы мамандықтарының жылын өткізу шеңберінде жүзеге асырылып, оқушыларға кәсіптік бағдар беру, еңбек нарығында сұранысқа ие дағдыларды меңгерту және болашақ мамандықты таңдауға бағыт беру мақсатында ұйымдастырылған.
2025 жылдың 19 ақпанында жоба аясында мектеп оқушылары Сервис және туризм колледжінің базасында орналасқан заманауи жабдықтармен жабдықталған зертханаларға экскурсия жасады. Экскурсия барысында оқушыларға аспаздық бойынша шеберлік сабақтары өткізіліп, олардың тәжірибелік дағдыларын дамытуға жағдай жасалды.
Жоспарға сәйкес, мектеп оқушылары ай сайын колледжге келіп, «Аспаз» дағдысын меңгеру мақсатында тәжірибелік сабақтарға қатысады. Бұл сабақтар арқылы олар тағам дайындау технологиясын, санитарлық-гигиеналық талаптарды сақтауды және аспаздық өнердің қыр-сырын үйренеді.
Жоба аясындағы іс-шаралар оқушылардың кәсіптік бағдарын айқындауға көмектесіп, олардың жұмысшы мамандықтарына деген қызығушылығын арттыруға бағытталған.